ಸರ್ಕಾರದ ಆದೇಶಕ್ಕೂ ಕ್ಯಾರೆ ಅನ್ನದ ‘ಪವರ್‌ಫುಲ್’ ಅಧಿಕಾರಿ!

ಮೂರು ತಿಂಗಳಲ್ಲಿ ಎರಡೆರಡು ವರ್ಗಾವಣೆ ಆದೇಶ; ಜಾಗ ಖಾಲಿ ಮಾಡದೆ ಒಂದೇ ಹುದ್ದೆಯಲ್ಲಿ ಭದ್ರವಾಗಿ ನೆಲೆಯೂರಿದ ಕೆ.ಎಂ.ಎ.ಎಸ್ ಅಧಿಕಾರಿ ಸುಮತಿ ಬಿ.ಎಸ್!

✍️ ಮಂಜುನಾಥ ಎಸ್.ರಾಠೋಡ

ಗದಗವಾಣಿ ವಿಶೇಷ ಬೆಂಗಳೂರು:

ಕರ್ನಾಟಕ ಸರ್ಕಾರದ ನಗರಾಭಿವೃದ್ಧಿ ಇಲಾಖೆ ಹಾಗೂ ಸಿಬ್ಬಂದಿ ಆಡಳಿತ ಸುಧಾರಣಾ ಇಲಾಖೆ ಹೊರಡಿಸುವ ಅಧಿಕೃತ ವರ್ಗಾವಣೆ ಆದೇಶಗಳಿಗೆ ಯಾವುದೇ ಬೆಲೆ ಇಲ್ಲವೇ?

ಸರ್ಕಾರದ ಉನ್ನತ ಮಟ್ಟದಿಂದ ಬರುವ ಸೂಚನೆಗಳನ್ನು ಗಾಳಿಗೆ ತೂರಿ, ನಿಯೋಜನೆಗೊಂಡ ಹೊಸ ಸ್ಥಳಕ್ಕೆ ತೆರಳದೆ ಒಂದೇ ಹುದ್ದೆಯಲ್ಲಿ ಸುದೀರ್ಘವಾಗಿ ಆಡಳಿತ ನಡೆಸಲು ಅಧಿಕಾರಿಗೆ ಬೆಂಬಲವಾಗಿ ನಿಂತಿರುವುದು ಯಾರು? ಇಂತಹದ್ದೊಂದು ಚರ್ಚೆ ಹಾಗೂ ಪ್ರಶ್ನೆ ಈಗ ವಿಕಾಸಸೌಧ ಮತ್ತು ಆಡಳಿತ ಯಂತ್ರದಲ್ಲಿ ತೀವ್ರವಾಗಿ ಸದ್ದು ಮಾಡುತ್ತಿದೆ.

ಹೌದು, ಕರ್ನಾಟಕ ಪೌರಾಡಳಿತ ಸೇವೆ (KMAS) ಶ್ರೇಣಿ-1ರ ಅಧಿಕಾರಿಯಾಗಿರುವ ಶ್ರೀಮತಿ ಸುಮತಿ ಬಿ.ಎಸ್. ಅವರ ಸುತ್ತ ಈಗ ಸಾಲು ಸಾಲು ಅನುಮಾನ ಹಾಗೂ ಆರೋಪಗಳ ದಟ್ಟ ಕಪ್ಪು ನೆರಳು ಆವರಿಸಿದೆ.

ಕೇವಲ 3 ತಿಂಗಳಲ್ಲಿ 2 ಬಾರಿ ವರ್ಗಾವಣೆ: ಆದರೂ ಕದಲದ ಕುರ್ಚಿ!

ಸರ್ಕಾರಿ ದಾಖಲೆಗಳು ಮತ್ತು ಇಲಾಖಾ ಅಧಿಸೂಚನೆಗಳ ಪ್ರಕಾರ, ಸುಮತಿ ಬಿ.ಎಸ್. ಅವರನ್ನು ಕೇವಲ ಮೂರು ತಿಂಗಳ ಅಂತರದಲ್ಲಿ ಎರಡೆರಡು ಬಾರಿ ಆಡಳಿತಾತ್ಮಕ ಹಿತದೃಷ್ಟಿಯಿಂದ ವರ್ಗಾವಣೆ ಹಾಗೂ ನಿಯೋಜನೆ (Deputation) ಮಾಡಿ ಆದೇಶ ಹೊರಡಿಸಲಾಗಿದೆ:

ಮೊದಲ ಆದೇಶ (04-05-2026):
ಕೌಶಲ್ಯಾಭಿವೃದ್ಧಿ, ಉದ್ಯಮಶೀಲತೆ ಮತ್ತು ಜೀವನೋಪಾಯ ಇಲಾಖೆಯ ಕಾರ್ಯನಿರ್ವಾಹಕ ನಿರ್ದೇಶಕಿ ಹುದ್ದೆಯಲ್ಲಿದ್ದ ಇವರನ್ನು ಚಿತ್ರದುರ್ಗ ಜಿಲ್ಲೆಯ ಜಿಲ್ಲಾ ನಗರಾಭಿವೃದ್ಧಿ ಕೋಶದ (DUDC) ಯೋಜನಾ ನಿರ್ದೇಶಕರಾಗಿ ತಕ್ಷಣದಿಂದ ಜಾರಿಗೆ ಬರುವಂತೆ ವರ್ಗಾಯಿಸಲಾಗಿತ್ತು.
ಎರಡನೇ ಆದೇಶ (07-08-2026): ನಂತರದ ಕೆಲವೇ ತಿಂಗಳುಗಳಲ್ಲಿ ಹೊರಬಿದ್ದ ಮತ್ತೊಂದು ಅಧಿಸೂಚನೆಯಲ್ಲಿ, ಇವರ ಸೇವೆಯನ್ನು ಮೂಲಸೌಲಭ್ಯ ಅಭಿವೃದ್ಧಿ, ಬಂದರು ಮತ್ತು ಒಳನಾಡು ಜಲಸಾರಿಗೆ ಇಲಾಖೆಯ ವಶಕ್ಕೆ ನೀಡಿ, K-RED / B-RID ಸಂಸ್ಥೆಯ ಪ್ರಧಾನ ವ್ಯವಸ್ಥಾಪಕರಾಗಿ (ಮಾನವ ಸಂಪನ್ಮೂಲ) ನಿಯೋಜಿಸಿ ರಾಜ್ಯಪಾಲರ ಆಜ್ಞಾನುಸಾರ ಆದೇಶಿಸಲಾಯಿತು.

ಆಶ್ಚರ್ಯದ ಸಂಗತಿ ಎಂದರೆ: ಸರ್ಕಾರಿ ಆದೇಶಗಳು ಸ್ಪಷ್ಟವಾಗಿ ಹೊರಬಿದ್ದಿದ್ದರೂ, ಈ ಅಧಿಕಾರಿ ನಿಯೋಜನೆಗೊಂಡ ಹೊಸ ಸ್ಥಳಗಳಿಗೆ ತೆರಳಿ ಅಧಿಕಾರ ವಹಿಸಿಕೊಂಡಿಲ್ಲ. ಕಳೆದ ಮೂರು ವರ್ಷಗಳಿಂದಲೂ ಕೌಶಲ್ಯಾಭಿವೃದ್ಧಿ, ಉದ್ಯಮಶೀಲತೆ ಮತ್ತು ಜೀವನೋಪಾಯ ಇಲಾಖೆಯಲ್ಲೇ ಭದ್ರವಾಗಿ ನೆಲೆಯೂರಿರುವುದು ಆಡಳಿತ ವ್ಯವಸ್ಥೆಯ ದುರಂತಕ್ಕೆ ಹಿಡಿದ ಕೈಗನ್ನಡಿಯಾಗಿದೆ.

ಶತಕೋಟಿ ರೂಪಾಯಿ ಯೋಜನೆಗಳ ಅಡಿಯಲ್ಲಿ ವ್ಯಾಪಕ ಭ್ರಷ್ಟಾಚಾರದ ಆರೋಪ!

ಕೌಶಲ್ಯಾಭಿವೃದ್ಧಿ, ಉದ್ಯಮಶೀಲತೆ ಮತ್ತು ಜೀವನೋಪಾಯ ಇಲಾಖೆ (SDEL) ರಾಜ್ಯದ ಯುವಕರು, ಮಹಿಳೆಯರು ಮತ್ತು ನಿರುದ್ಯೋಗಿಗಳಿಗೆ ನೂತನ ಭರವಸೆ ಮೂಡಿಸುವ ಬೃಹತ್ ಯೋಜನೆಗಳನ್ನು ನಿರ್ವಹಿಸುತ್ತದೆ. ಆದರೆ, ಈ ಇಲಾಖೆಯ ಪ್ರಮುಖ ಯೋಜನೆಗಳಲ್ಲಿ ವ್ಯಾಪಕ ಅಕ್ರಮ ಹಾಗೂ ಭ್ರಷ್ಟಾಚಾರ ನಡೆದಿದೆ ಎಂಬ ಗಂಭೀರ ಆರೋಪಗಳು ಕೇಳಿಬರುತ್ತಿವೆ:

CMKKY ಹಾಗೂ PMKVY: ಉಚಿತ ತಾಂತ್ರಿಕ ತರಬೇತಿ ನೀಡುವ ಹೆಸರಿನಲ್ಲಿ ನಕಲಿ ಫಲಾನುಭವಿಗಳನ್ನು ಸೃಷ್ಟಿಸಿ, ತರಬೇತಿ ನೀಡುವ ಖಾಸಗಿ ಸಂಸ್ಥೆಗಳ (Training Partners) ಜೊತೆ ಶಾಮೀಲಾಗಿ ಕೋಟ್ಯಂತರ ರೂಪಾಯಿ ದುರ್ಬಳಕೆ ಮಾಡಿಕೊಂಡಿರುವ ಶಂಕೆ.
ಯುವನಿಧಿ & STRIVE ಯೋಜನೆಗಳು: ನಿರುದ್ಯೋಗಿ ಯುವಜನರಿಗೆ ತಲುಪಬೇಕಾದ ಪ್ರೋತ್ಸಾಹಧನ ಹಾಗೂ ITI ಸಂಸ್ಥೆಗಳ ಬಲವರ್ಧನೆಗೆ ಮೀಸಲಾದ ಅನುದಾನ ಹಂಚಿಕೆಯಲ್ಲಿ ಅಕ್ರಮ.
ಸಂಜೀವಿನಿ (NRLM) & DAY-NULM: ಗ್ರಾಮೀಣ ಮತ್ತು ನಗರ ಪ್ರದೇಶದ ಮಹಿಳಾ ಸ್ವಸಹಾಯ ಸಂಘಗಳಿಗೆ (SHG) ನೀಡಲಾಗುವ ಸುತ್ತುನಿಧಿ, ಸಮುದಾಯ ಬಂಡವಾಳ ಹಾಗೂ ಸಬ್ಸಿಡಿ ಸಾಲ ಮಂಜೂರಾತಿಯಲ್ಲಿ ಕಮಿಷನ್ ದಂದೆ.
ಕರ್ನಾಟಕ ಕಾಯಕ ಯೋಜನೆ & RSETI: ಸ್ವಯಂ ಉದ್ಯೋಗ ಉತ್ತೇಜನದಡಿ ನೀಡಲಾಗುವ ಬಡ್ಡಿರಹಿತ ಸಾಲ ಸೌಲಭ್ಯ ಹಾಗೂ ಉದ್ಯಮಶೀಲತಾ ತರಬೇತಿ ಕಾರ್ಯಕ್ರಮಗಳ ಅನುದಾನದಲ್ಲಿ ಭಾರೀ ಅಕ್ರಮ.

ಕೋಟ್ಯಂತರ ರೂಪಾಯಿ ಸರ್ಕಾರದ ಹಣ ಹರಿದುಬರುವ ಈ ಇಲಾಖೆಯಲ್ಲಿನ “ಪ್ರಭಾವಿ ಹುದ್ದೆ”ಯನ್ನು ಬಿಟ್ಟುಕೊಡಲು ಅಧಿಕಾರಿ ಒಪ್ಪುತ್ತಿಲ್ಲದಿರುವುದಕ್ಕೆ ಈ ಯೋಜನೆಗಳ ಅಡಿಯಲ್ಲಾಗುವ ಕೋಟಿ ಕೋಟಿ ವ್ಯವಹಾರವೇ ಮುಖ್ಯ ಕಾರಣವೇ ಎಂಬ ಪ್ರಶ್ನೆ ಸಾರ್ವಜನಿಕ ವಲಯದಲ್ಲಿ ಎದ್ದಿದೆ.

ವರ್ಗಾವಣೆ ತಡೆಯುತ್ತಿರುವ ‘ಅಗೋಚರ ಶಕ್ತಿ’ ಅಥವಾ ‘ಪ್ರಭಾವಿ ಕೈ’ ಯಾರು?

ಸಾಮಾನ್ಯ ಸರ್ಕಾರಿ ನೌಕರರೊಬ್ಬರು ವರ್ಗಾವಣೆಯಾದ ಕೆಲವೇ ದಿನಗಳಲ್ಲಿ ಹೊಸ ಸ್ಥಳದಲ್ಲಿ ವರದಿ ಮಾಡಿಕೊಳ್ಳದಿದ್ದರೆ ನೋಟೀಸ್ ಜಾರಿಯಾಗುತ್ತದೆ, ಶಿಸ್ತುಕ್ರಮ ಜರುಗಿಸಲಾಗುತ್ತದೆ. ಆದರೆ, ಕೆ.ಎಂ.ಎ.ಎಸ್ ಅಧಿಕಾರಿಯೊಬ್ಬರು ಸರ್ಕಾರದ ಅಧಿಸೂಚನೆಗಳನ್ನೇ ಕಡೆಗಣಿಸಿ ಒಂದೇ ಸ್ಥಳದಲ್ಲಿ ಕುಳಿತಿದ್ದರೂ ಆಡಳಿತ ಯಂತ್ರ ಮೌನವಾಗಿರುವುದರ ಹಿಂದಿನ ರಹಸ್ಯವೇನು?

ರಾಜಕೀಯ ಅಭಯ: ಇಲಾಖೆಯ ಉನ್ನತ ಮಟ್ಟದ ಪ್ರಭಾವಿ ರಾಜಕಾರಣಿಯೊಬ್ಬರು ಅಥವಾ ಪ್ರಭಾವಿ ಸಚಿವರ ಕೃಪಾಕಟಾಕ್ಷ ಈ ಅಧಿಕಾರಿಯ ಮೇಲಿದೆಯೇ?
ಸಿಬ್ಬಂದಿ ವರ್ಗದ ಪ್ರಭಾವಿ ಅಧಿಕಾರಿಗಳ ಸಾಥ್: ವಿಧಾನಸೌಧ-ವಿಕಾಸಸೌಧದ ಐಎಎಸ್ (IAS) ಮಟ್ಟದ ಹಿರಿಯ ಅಧಿಕಾರಿಗಳೇ ಈ ವರ್ಗಾವಣೆ ಆದೇಶಗಳನ್ನು ಕೇವಲ ಕಾಗದಕ್ಕಷ್ಟೇ ಸೀಮಿತಗೊಳಿಸಿ, ಹಿಂಬಾಗಿಲ ಮೂಲಕ ರಕ್ಷಣೆ ನೀಡುತ್ತಿದ್ದಾರೆಯೇ?

ಆಡಳಿತಾತ್ಮಕ ಪಾರದರ್ಶಕತೆ ಮತ್ತು ಜವಾಬ್ದಾರಿಯನ್ನು ಎತ್ತಿಹಿಡಿಯಬೇಕಾದ ಸರ್ಕಾರ, ಇಂತಹ ನಿಯಮಬಾಹಿರ ನಡವಳಿಕೆಗಳ ವಿರುದ್ಧ ತಕ್ಷಣವೇ ತನಿಖೆ ನಡೆಸಿ ಸೂಕ್ತ ಶಿಸ್ತುಕ್ರಮ ಜರುಗಿಸುವುದೇ ಅಥವಾ ಈ “ಅಗೋಚರ ಶಕ್ತಿಗಳ” ಒತ್ತಡಕ್ಕೆ ಮಣಿದು ಮೌನ ವಹಿಸುವುದೇ ಎಂಬುದನ್ನು ಕಾದು ನೋಡಬೇಕಿದೆ.