ಸುಪ್ರೀಂ ಕೋರ್ಟ್ ತೀರ್ಪಿಗೆ ಕದನ ವಿರಾಮ ಸಾರಿದರೇ ಗದಗ ಪೊಲೀಸರು?
ಡಿವೈಎಸ್ಪಿ ಖಾದ್ರಿ ಹಾಗೂ ಸಿಪಿಐ ಸಿದ್ದರಾಮೇಶ್ವರ ವಿರುದ್ಧವೇ ಹೂಡಲಾಯ್ತು ಕ್ರಿಮಿನಲ್ ಮೊಕದ್ದಮೆ!
ಗದಗವಾಣಿ ಸುದ್ದಿಮೂಲ
ಗದಗ:
ದೇಶದ ಸರ್ವೋಚ್ಚ ನ್ಯಾಯಾಲಯವು ಐತಿಹಾಸಿಕ ‘ಲಲಿತಾ ಕುಮಾರಿ ವರ್ಸಸ್ ಉತ್ತರ ಪ್ರದೇಶ ಸರ್ಕಾರ’ ಪ್ರಕರಣದಲ್ಲಿ ನಿಗದಿಪಡಿಸಿದ ಕಟ್ಟುನಿಟ್ಟಾದ ಕಾನೂನು ಮಾರ್ಗಸೂಚಿಗಳನ್ನು ಉದ್ದೇಶಪೂರ್ವಕವಾಗಿ ಉಲ್ಲಂಘಿಸಿದ ಹಾಗೂ ಕಾನೂನಿನ ರಕ್ಷಕರೇ ಒಂದು ಪಕ್ಷದ ಪರವಾಗಿ ನಿಂತು ಅಧಿಕಾರ ದುರುಪಯೋಗಪಡಿಸಿಕೊಂಡ ಗಂಭೀರ ಆರೋಪದ ಮೇಲೆ ಗದಗ ಡಿಎಸ್ಪಿ ಹಾಗೂ ಗ್ರಾಮೀಣ ಠಾಣೆಯ ಸಿಪಿಐ ವಿರುದ್ಧ ಗದಗ ಜೆಎಂಎಫ್ಸಿ (JMFC) ೨ನೇ ನ್ಯಾಯಾಲಯದಲ್ಲಿ ಕ್ರಿಮಿನಲ್ ಮೊಕದ್ದಮೆ ದಾಖಲಾಗಿದೆ!
ಪೊಲೀಸ್ ಇಲಾಖೆಯ ಉನ್ನತ ಅಧಿಕಾರಿಗಳ ವಿರುದ್ಧವೇ ಸ್ವತಃ ಸಾರ್ವಜನಿಕರೊಬ್ಬರು ನ್ಯಾಯಾಲಯದ ಮೆಟ್ಟಿಲೇರಿ ಕಕ್ಷೆದಾರರಾಗಿ ನಿಂತಿರುವುದು ಇಡೀ ಜಿಲ್ಲೆಯ ಪೊಲೀಸ್ ಮತ್ತು ಕಾನೂನು ವಲಯದಲ್ಲಿ ತಲ್ಲಣ ಸೃಷ್ಟಿಸಿದೆ.
ಪ್ರಕರಣದ ಹಿನ್ನೆಲೆ:
೮ ತಿಂಗಳ ದಾಂಪತ್ಯ, ೩ ವರ್ಷಗಳಲ್ಲಿ ೧೧೯ ಕೇಸ್ಗಳು!
ಇದು ಕೇವಲ ಗಂಡ-ಹೆಂಡತಿಯ ನಡುವಿನ ಸಾಮಾನ್ಯ ಜಗಳವಲ್ಲ, ನ್ಯಾಯಾಂಗದ ಇತಿಹಾಸದಲ್ಲೇ ದಾಖಲೆ ಬರೆಯುವಂತಹ ಕಾನೂನು ಸಮರ.
- ೨೦೨೧ ರಲ್ಲಿ ಆಯುಬ್ ಸಣ್ಣಹಸನಸಾಬ ನದ್ದಿಮುಲ್ಲಾ ಹಾಗೂ ನವರೀನಬಾನು ಮಕಾನದಾರ ಎಂಬುವವರ ವಿವಾಹವಾಗಿತ್ತು.
- ಆದರೆ, ವಿಧಿಯಾಟ ಎನ್ನುವಂತೆ ಇಬ್ಬರೂ ಒಟ್ಟಿಗೆ ಬಾಳಿದ್ದು ಕೇವಲ ೮ ತಿಂಗಳು ಮಾತ್ರ! ತದನಂತರ ಕ್ಷುಲ್ಲಕ ಕಾರಣಕ್ಕೆ ಆರಂಭವಾದ ದಾಂಪತ್ಯ ಕಲಹ ಬೀದಿಗೆ ಬಂತು.
- ಕಳೆದ ೩ ವರ್ಷಗಳಲ್ಲಿ ಇವರಿಬ್ಬರ ಜಗಳದ ಪರಿಣಾಮವಾಗಿ ಗದಗ ನ್ಯಾಯಾಲಯದಲ್ಲಿ ೮೯ ಪ್ರಕರಣಗಳು ಹಾಗೂ ಮಾನ್ಯ ಉಚ್ಛ ನ್ಯಾಯಾಲಯದಲ್ಲಿ (High Court) ಬರೋಬ್ಬರಿ ೩೦ ಪ್ರಕರಣಗಳು ದಾಖಲಾಗಿವೆ!
ನಿರಂತರ ಧಮಕಿ, ಗೂಂಡಾವರ್ತನೆ ಹಾಗೂ ಕಾನೂನು ಸುವ್ಯವಸ್ಥೆಗೆ ಧಕ್ಕೆ ತಂದ ಹಿನ್ನೆಲೆಯಲ್ಲಿ ಈ ಹಿಂದೆ ಹೆಂಡತಿ ನವರೀನಬಾನು ಮತ್ತು ಆಕೆಯ ಕುಟುಂಬವನ್ನು ಗಡಿಪಾರು (Externment) ಸಹ ಮಾಡಲಾಗಿತ್ತು ಎನ್ನುವುದು ಈ ಪ್ರಕರಣದ ತೀವ್ರತೆಯನ್ನು ಸಾರುತ್ತದೆ.
ಯುಪಿಎಸ್ಸಿ ಕ್ಲಾಸ್ಮೇಟ್ಗಳ ‘ನೆರವು’ ಮತ್ತು ‘ಲಲಿತಾ ಕುಮಾರಿ’ ತೀರ್ಪಿನ ಉಲ್ಲಂಘನೆ!
ಈ ಇಡೀ ಹೈ-ಡ್ರಾಮಾಕ್ಕೆ ಹೊಸ ಟ್ವಿಸ್ಟ್ ಸಿಕ್ಕಿರುವುದು ಬೆಂಗಳೂರಿನ UPSC ಕೋಚಿಂಗ್ ದಿನಗಳ ಸ್ನೇಹದ ಹಿನ್ನೆಲೆಯಲ್ಲಿ! ದೂರುದಾರ ಆಯುಬ್ ಹಾಗೂ ಆತನ ಪತ್ನಿ ನವರೀನಬಾನು ಇಬ್ಬರೂ ಬೆಂಗಳೂರಿನಲ್ಲಿ ಯುಪಿಎಸ್ಸಿ ಪರೀಕ್ಷೆಯ ತರಬೇತಿ ಪಡೆಯುತ್ತಿದ್ದಾಗ, ಪ್ರಸ್ತುತ ಗದಗ ಡಿಎಸ್ಪಿ ಆಗಿರುವ ಮುರ್ತುಜಾ ಖಾದ್ರಿ ಅವರ ಸಹಪಾಠಿ (Classmates) ಗಳಾಗಿದ್ದರು.
ಆರೋಪದ ಮುಖ್ಯಾಂಶಗಳು:
ಜೂನ್ ೪ ರಂದು ಪತಿ ಆಯುಬ್ ತನ್ನ ಪತ್ನಿ ವಿರುದ್ಧ ದೂರು ದಾಖಲಿಸಲು ಗದಗ ಗ್ರಾಮೀಣ ಠಾಣೆಯ ಸಿಪಿಐ ಸಿದ್ದರಾಮೇಶ್ವರ ಗಡದ ಅವರ ಬಳಿ ಹೋಗಿದ್ದರು. ಆದರೆ, ೩ ವರ್ಷಗಳ ಒಳಗಿನ ಶಿಕ್ಷಾರ್ಹ ಅಪರಾಧದ ಪ್ರಕರಣಗಳಲ್ಲಿ ‘ಸ್ಥಾನಿಕ ಪರಿಶೀಲನೆ’ (Spot Inspection/Preliminary Inquiry) ಮಾಡಲು ಕಾನೂನಿನಲ್ಲಿ ಅವಕಾಶವಿಲ್ಲದಿದ್ದರೂ, ಸಿಪಿಐ ಸಿದ್ದರಾಮೇಶ್ವರ ಅವರು ಕಾನೂನು ಬಾಹಿರವಾಗಿ ಸ್ಥಾನಿಕ ಪರಿಶೀಲನೆ ನಡೆಸಿದ್ದಾರೆ.
ಇದಕ್ಕೆ ಡಿಎಸ್ಪಿ ಮುರ್ತುಜಾ ಖಾದ್ರಿ ಅವರು ಸಹಿ ಹಾಕಿ ಕಾನೂನಿಗೆ ತದ್ವಿರುದ್ಧವಾಗಿ ನಡೆದುಕೊಂಡಿದ್ದಾರೆ.
ಸುಪ್ರೀಂ ಕೋರ್ಟ್ನ ‘ಲಲಿತಾ ಕುಮಾರಿ’ ತೀರ್ಪಿನ ಪ್ರಕಾರ, ಸಂಜ್ಞೇಯ ಅಪರಾಧದ (Cognizable Offense) ಮಾಹಿತಿ ದೊರೆತ ತಕ್ಷಣ ಎಫ್ಐಆರ್ ದಾಖಲಿಸುವುದು ಕಡ್ಡಾಯ. ಆದರೆ ಇಲ್ಲಿ ಹಳೇ ಸ್ನೇಹದ ಹಿನ್ನೆಲೆಯಲ್ಲಿ, ಹೆಂಡತಿಯ ಪರವಾಗಿ ನಿಂತು ಪೊಲೀಸರು ತನಿಖೆಯ ಹಾದಿ ತಪ್ಪಿಸಿದ್ದಾರೆ ಮತ್ತು ಉದ್ದೇಶಪೂರ್ವಕವಾಗಿ ಪತಿಯ ದೂರನ್ನು ದಾಖಲಿಸಿಕೊಳ್ಳದೆ ಕರ್ತವ್ಯ ಲೋಪ ಎಸಗಿದ್ದಾರೆ ಎಂಬುದು ದೂರುದಾರರ ನೇರ ಆರೋಪ.
ನ್ಯಾಯಾಲಯದ ಅಂಗಳದಲ್ಲಿ ಖಾಕಿ ಪಡೆ: ದೂರು ದಾಖಲು
ಪೊಲೀಸ್ ಉನ್ನತಾಧಿಕಾರಿಗಳು ಕಾನೂನಿನ ಪರಿಧಿಯನ್ನು ಮೀರಿ ವರ್ತಿಸುತ್ತಿರುವುದನ್ನು ಪ್ರತಿಭಟಿಸಿ ಆಯುಬ್ ಅವರು ದಿನಾಂಕ ೨೧-೦೬-೨೦೨೬ ರಂದು ಗದಗ ನ್ಯಾಯಾಲಯಕ್ಕೆ ಖಾಸಗಿ ದೂರು (Private Complaint) ಸಲ್ಲಿಸಿದ್ದರು. ಈ ದೂರನ್ನು ಗಂಭೀರವಾಗಿ ಪರಿಗಣಿಸಿದ ಗದಗ ಜೆಎಂಎಫ್ಸಿ ೨ನೇ ನ್ಯಾಯಾಲಯವು ಇಂದು, ಅಂದರೆ ದಿನಾಂಕ ೨೩-೦೬-೨೦೨೬ ರಂದು ಡಿಎಸ್ಪಿ ಮುರ್ತುಜಾ ಖಾದ್ರಿ ಹಾಗೂ ಸಿಪಿಐ ಸಿದ್ದರಾಮೇಶ್ವರ ಗಡದ ವಿರುದ್ಧ ಅಧಿಕೃತವಾಗಿ ಕ್ರಿಮಿನಲ್ ದೂರು ದಾಖಲಿಸಿಕೊಂಡಿದೆ.
ಪಾಕಿಸ್ತಾನ ಧ್ವಜ ವಿವಾದದ ಕರಾಳ ನೆರಳು!
ಈ ಕೌಟುಂಬಿಕ ಕಲಹ ಕೇವಲ ಗಂಡ-ಹೆಂಡತಿಯ ಜಗಳವಾಗಿ ಉಳಿದಿಲ್ಲ, ದೇಶದ್ರೋಹದ ಆರೋಪದವರೆಗೂ ಮುಟ್ಟಿದೆ. ಇತ್ತೀಚೆಗಷ್ಟೇ ಹೆಂಡತಿ ನವರೀನಬಾನು ಮಕಾನದಾರ ಅವರ ಸಹೋದರ ಅಬ್ದುಲ ಡಂಬಲ್ ಎಂಬಾತನ ಮೇಲೆ ಪಾಕಿಸ್ತಾನದ ಧ್ವಜ ಹಾರಿಸಿದ ಗಂಭೀರ ದೇಶದ್ರೋಹದ ಪ್ರಕರಣ ದಾಖಲಾಗಿದೆ. “ಅವರ ಇಡೀ ಕುಟುಂಬವೇ ಪಾಕಿಸ್ತಾನಿ ಪ್ರೇಮಿ ಕುಟುಂಬ” ಎಂದು ಪತಿ ಆಯುಬ್ ಗಂಭೀರ ಆರೋಪ ಮಾಡಿದ್ದಾರೆ. ಇಂತಹ ದೇಶವಿರೋಧಿ ಕೃತ್ಯದ ಹಿನ್ನೆಲೆಯುಳ್ಳವರ ಪರವಾಗಿ ಗದಗ ಪೊಲೀಸರು ನಿಂತಿರುವುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಕಾನೂನು ನೋಟ :
- ಲಲಿತಾ ಕುಮಾರಿ ತೀರ್ಪು ಸುಪ್ರೀಂ ಕೋರ್ಟ್ನ ಈ ತೀರ್ಪಿನ ಪ್ರಕಾರ, ಗಂಭೀರ ಅಪರಾಧದ ಮಾಹಿತಿ ಬಂದಾಗ ಪ್ರಾಥಮಿಕ ತನಿಖೆಯ ನೆಪದಲ್ಲಿ ಎಫ್ಐಆರ್ ದಾಖಲಿಸುವುದನ್ನು ವಿಳಂಬ ಮಾಡುವಂತಿಲ್ಲ.
- ಸ್ಥಾನಿಕ ಪರಿಶೀಲನೆ ಉಲ್ಲಂಘನೆ: ನಿರ್ದಿಷ್ಟ ಅವಧಿಯ ಶಿಕ್ಷೆಯ ವ್ಯಾಪ್ತಿಗೆ ಬರುವ ಪ್ರಕರಣಗಳಲ್ಲಿ ಕಾನೂನು ಪ್ರಕ್ರಿಯೆ ದಾಟಿ ತನಿಖಾಧಿಕಾರಿಗಳು ಸ್ವಯಂಪ್ರೇರಿತ ನಿರ್ಧಾರ ಕೈಗೊಳ್ಳುವುದು ಅಧಿಕಾರ ದುರುಪಯೋಗ ಎನಿಸಿಕೊಳ್ಳುತ್ತದೆ.
ಕಾನೂನು ರಕ್ಷಕರೆನಿಸಿಕೊಂಡವರೇ ಈಗ ನ್ಯಾಯಾಲಯದ ಕಟಕಟೆಯಲ್ಲಿ ನಿಲ್ಲುವಂತಾಗಿದ್ದು, ಗದಗ ಕೋರ್ಟ್ ಈ ಇಬ್ಬರು ಉನ್ನತ ಪೊಲೀಸ್ ಅಧಿಕಾರಿಗಳಿಗೆ ಯಾವ ರೀತಿಯ ಕಾನೂನು ಪಾಠ ಕಲಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
➡️ ರವಿಕುಮಾರ ಹಿರೇಮಠ,
ಕ್ರೈಮ್ ಬ್ಯೂರೋ, ಗದಗ.
About the Author
